Nú er búið að sónarskoða undan Auði frá Lundum og Kompási frá Skagaströnd og komu þeir vel út. Auður er með 84% fyljunarhlutfall og Kompás kom einnig mjög vel út en hann verður áfram í nokkrum merum og þ.á.m. er Ísgerður. Þrjár merar frá okkur reyndust með fyli og erum við mjög sæl með það en það er trú okkar að Kompás eigi eftir að sanna sig.

Einar er búinn að vera að vesenast í húsunum og undirbúa gólfskiptin en eins og alltaf er nóg að gera í sveitinni. Við erum einnig búin að vera í tiltekt úti og tína hestburði af grjóti en það er eins og ekki sjáist högg á vatni.  Ég set hér að gamni inn nokkrar myndir úr garðinum og blómunum í kring.

Þá er það ákveðið að sónarskoðað verður undan Kompási og Auði n.k. mánudag en þá verða liðnir 17. dagar frá því að Auður fór og ætti að vera útséð með hvort þessar 10. merar sem eftir voru eru með fyli.  Sl. 3. dagar hafa verið yndislegir, hlýjir og næstum logn. Þrifum á útihúsunum eru að mestu lokið og er allt orðið glimrandi fínt en Ragnar okkar Elías er eina hrossið sem er inni en hann var geltur í vor og er ekki alveg að höndla að baunirnar eru farnar, endalaust að reka og flokka heimahrossin og var því ekki hægt að hafa hann með þeim.  Vonandi eldist þetta fljótt af honum því hann verður trúlega reiðhestur stelpnanna og eru þær mjög hrifnar af honum.  Mjúkur töltari með geðslag upp á 10 og sýndi það sig best þegar verið var að háþrýstiþvo í kringum hann í húsunum  Hann er undan Flótta og meri frá Hóli sem er systir Öbbu frá Gili.

Mér finnst ágúst alltaf yndislegur tími, allt í blóma og farið að rökkva svo hægt er að kveikja á kertum, berjatíminn að byrja og svo koma haustlitirnir sem eru oft svo ótrúlega fallegir. Set inn myndir af hinu og þessu.

Veðrið ætlar ekki að leika við okkur norðlendinga þetta sumarið en undanfarnar vikur hafa að mestu einkennst af súld eða rigningu.  Við höfum notað tímann sl. daga í tiltekt og er verið að háþrýstiþvo hesthúsið og fjárhúsið og er síðan ætlunin að skipta um gólf í fjárhúsinu en það er orðið hálf ónýtt.  Það er helst að frétta að Orradóttirin Ísgerður er farin undir Kompás og Flótta- og Hrafnhettudóttirin Bryðja fór til Frosta frá Efri-Rauðalæk.  Við erum með 3. merar hjá Markúsi og 3. hjá Kompási og tvær voru hjá Auði, svo von verður á óvenju mörgum folöldum næsta vor ef allt gengur upp.

Við gengum niður í hólfið hjá Kompási í morgun og var gaman að sjá Sóldögg Lýsu-og Þokkasóttur kúra makindarlega hjá móður sinni.  Kompás kom og vildi láta klappa sér en ætlunin er að sónarskoða undan honum eftir rúma viku þegar restin af Auðsmerunum verða skoðaðar aftur. Kompás fer síðan suður í tamningu í haust.

Þá er hún Stássa köstuð en eigendur hennar eru þau Hákon og María. Í gærkveldi komum við heim úr 3. daga ferðalagi úr Öxarfirði og nágrenni og fór Einar þá niður í hólf og fannst merin orðin líkleg og í morgun sáum við þennan demant en hann er  brún-stjörnóttur, sokkóttur, skottóttur og fer um á góðgangi, faðir hans er Sveinn Hervar. Móðir hans tók okkur vel og þáði brauð á meðan við grandskoðuðum soninn. Við tókum nokkrar myndir af honum og einnig eru nokkrar myndir úr ferðalaginu.  Við kvöddum Kalla, Sirrý, Kötlu, Margréti og Jökul í dag en þau voru að flytja til Danmerkur og var það mjög erfitt en við eigum vonandi eftir að sjá þau fljótlega.  Katla er besta vinkona stelpnanna og eins og þriðja barnið okkar, hefur verið hér með annan fótinn síðan hún var  5.ára

Þá er búið að sónarskoða undan Auði frá Lundum og koma það mjög vel út eða 21. hryssa með fyli af 31. og af þessum tíu voru margar mjög líklegar svo það þarf að bíða í ca. hálfan mánuð til að sjá hver endanleg niðurstaða verður.  Báðar merarnar okkar þær Hrafntinna og Langa-Brúnka frá Höfða voru með fyli og erum við að sjálfsögðu mjög ánægð með það.  Nú er Markús kominn í hólfið sem Auður var í og Auður verður í litlu hólfi með þessar 10. merar þangað til hann fer en hann verður í Landeyjunum seinna gangmálið.  Hér kemur ein kveðjumynd af þessum flotta höfðingja sem á áræðanlega eftir að marka sín spor í íslenskri hrossarækt.

Á föstudaginn kl. 11:00 fer fram sónarskoðun á merum sem voru hjá Auði frá Lundum.  Þær merar sem ekki sónast jákvæðar verða síðan áfram í ca. 15.-17. daga og verða þá aftur skoðaðar. Fólk er beðið um að mæta og taka sínar merar sem sónast jákvæðar því Markús fer síðan í hólfið sem Auður var í.  Það eru komnar 23. hryssur til Markúsar og er ein þeirra hér heima og fær að hitta hann þar, þar sem hún fyljast ekki í hólfi.  Mikið  er komið af góðum og hátt dæmdum hryssum til hans og er það oftast vegna þess að eigendur eiga gæðinga undan honum og eru að reyna að skapa nýja.

Það er mikill spenningur hjá heimasætunum á bænum því nú er aðeins mánuður í að fjölskyldan fari til Ameríku eða þann 21. ágúst.  Flogið verður til New York og þaðan förum við svo til Philadelphiu en þar búa Hákon og María og verðum við á hótel Maríu í til 29. ágúst. Við höfum farið þangað nokkrum sinnum áður og átt þar dýrðlegar stundir.  Hér fylgja að gamni nokkrar myndir að heimkynnum þeirra hjóna en þau eru með íslenska hesta í garðinum og eru útreiðaleiðirnar ekki að verri endanum.

Þá er Markús mættur og biðum við spennt eftir að sjá höfðingjann mæta en gróusögur höfðu borist okkur til eyrna um kjötmikinn hest og urðu þær að engu þegar við sáum hann 16. vetra, tígulegann, fasmikinn með mikinn prúðleika og hófskegg sem prýðir fáa hesta á Íslandi í dag. Geðslagið er frábært og þar sem við teymdum hann í gegnum hrossahóp greyp hann ekki í taum.  Birta var í látum og beið hans og var málið afgreitt á skammri stundu.

Salka frá Kvíabekk kastaði í morgun brúnu hestfolaldi sem er undan Öl okkar og náðum við myndum af honum þar sem hann er ca. 10. mínútna gamall og hjálpuðum við honum á fætur.  Við skruppum á fagnað í nýju reiðhöllinni hjá Létti og var það hin besta skemmtun.

Á morgun kemur Markús og biðjum við alla þá sem hafa pantað undir hann að vera í sambandi við okkur.  Hann mun fara í hólfið hans Auðs þegar hann fer þann 25. júlí en fram að þeim tíma verður hann hér heima.  Það er helst að frétta að Njála er köstuð brúnni  hryssu og höfum við því fengið 5. hryssur nú í vor og 1. fola og erum afar ánægð með það.  Það hefur verið mikið um gestakomur og var hér margt um manninn bæði í dag og í gær.  Í gær komu m.a. svíar sem voru að skoða hross og í kvöld komu 2. konur að líta á meri sem önnur á í hólfinu hjá Auði.  Það var eins og alltaf þegar við komum í hólfið til hans að hann kemur á fasmiklu tölti til að kanna hver er komin. Það er allt í mikilli ró og spekt og eru trúlega allflestar merarnar komnar með fyl.  Við erum búin að kíkja á íslandsmótið sl. 2. daga í stutta stund í senn en ætlum að horfa lengur á morgun, vonandi verður veðrið gott svo allir geti notið þess að horfa á utandyra við þessar frábæru aðstæður sem komnar eru.

                                                                      Grænmeti úr heimagarðinum, svo ótrúlega fallegt, grænt og fullt af vitamínum